Алматының Орталық ипподромында өткен Наурыз мерекесі тарихи оқиғамен есте қалды. Салтанатты думан аясында қазақ спортшылары түйе үстінде садақ ату және ат үстіндегі шеберлік (джигитовка) бойынша әлемдік рекордтарды жаңартты.
Қалалық Спорт басқармасы мен Ұлттық және ат спорты түрлерінің спорт клубы ұйымдастырған шарада ежелгі дәстүрлер заманауи спорттық драйвпен ұштасты.
Түйе үстіндегі мергендік: Динара Сайдалинаның рекорды
«Топжарған» этномәдени орталығының тәрбиеленушісі Динара Сайдалина әлемдік деңгейдегі бірегей жетістікке қол жеткізді. Ол сағатына 35,9 шақырым жылдамдықпен шапқан түйенің үстінде отырып, барлық төрт нысананы мүлт жібермей атып түсірді. 
«Түйені жоғары жылдамдықта басқару атқа қарағанда әлдеқайда күрделі. Біз бұл рекордқа соңғы екі айда мақсатты түрде, аяз бен қарға қарамай дайындалдық. Қажырлы еңбегіміз ақталғанына қуаныштымын», – дейді рекордшы.
Ернар Жасұзақ: Қолдың көмегінсіз атқарушылық шеберлік
Тағы бір таңдай қақтырарлық нәтижені Ернар Жасұзақ көрсетті. Ол «Айқасқа» атты тұлпарымен 43,331 км/сағ орташа жылдамдықпен 500 метр қашықтықты жүріп өтті. Рекордтың басты ерекшелігі — спортшы ат үстінде тік тұрып, тізгінді қолмен ұстамастан тұлпарды басқарған. 
Спортшы бұл жетістігін ата-баба рухына тағзым және ұлттық өнердің еркіндік символы деп бағалады. Екі рекорд та арнайы кәсіби лазерлік жабдықтармен тіркеліп, ресми мәртебе алды. 
Ипподром айдынындағы тартысты көкпар бәсекесінде «Жетісу» командасы қарсыластарынан басым түсіп, жеңімпаз атанды. Екінші орынды «Қарасай» ұжымы иеленсе, үздік үштікті «Ұлттық және ат спорты» клубы түйіндеді. Сонымен қатар, мереке аясында қазақ күресі, асық ату және арқан тартудан бұқаралық жарыстар өтіп, жеңімпаздар марапатталды.