Қазақстан Республикасының Президенті Қасым-Жомарт Тоқаев «Қазақстан Республикасы Вице-президентінің өкілеттіктері туралы» Жарлыққа қол қойды. Бұл туралы Ақорданың баспасөз қызметі хабарлайды.
Аталған құжатқа сәйкес, Вице-президентке мемлекеттік маңызы бар стратегиялық міндеттер мен халықаралық деңгейдегі өкілдік қызметтер жүктелген.
Негізгі өкілеттіктер мен функциялар
Жарлықта Вице-президенттің лауазымдық міндеттері мен жауапкершілік аймағы нақты айқындалған:
-
Елдің ішкі және сыртқы саясатын дамытуға бағытталған стратегиялық ұсыныстарды әзірлеп, Президенттің қарауына ұсынады.
-
Құрылтаймен, Үкіметпен, мемлекеттік органдармен, сондай-ақ саяси партиялармен, қоғамдық бірлестіктермен және халықаралық ұйымдармен өзара іс-қимыл барысында Мемлекет басшысының атынан өкілдік етеді.
-
Президенттің тапсырмасы бойынша жоғары деңгейдегі халықаралық іс-шараларға қатысады, Әлемдік және дәстүрлі діндер лидерлері съезінің хатшылығын басқарады, сондай-ақ Қазақстанның стратегиялық зерттеулер институтының (ҚСЗИ) қызметіне жетекшілік етеді.
Құқықтық мәртебесі мен шешім қабылдау құзыреті
Белгіленген өкілеттіктерді сапалы іске асыру мақсатында Вице-президентке бірқатар заңнамалық құқықтар берілді:
-
Өкімдер шығару және өзіне жүктелген құзырет шегінде орталық әрі жергілікті атқарушы органдарға орындалуы міндетті тапсырмалар беру;
- Құрылтай, Үкімет, Халық Кеңесі, сондай-ақ Президент жанындағы консультативтік-кеңесші органдардың отырыстарына қатысу.
Дереккөз: akorda.kz