Төтенше жағдайлар министрлігі көктемгі су тасқыны кезеңіне дайындық жұмыстары еліміз бойынша жоспарлы түрде жүргізіліп жатқанын хабарлады. Ведомствоның мәліметіне сәйкес, елді мекендер мен инфрақұрылым нысандарын қорғау, сондай-ақ ықтимал қауіптердің алдын алу бағытында кешенді шаралар іске асырылуда.
Абай облысында су басу қаупі бар аумақтар мен гидротехникалық нысандарға әуеден бақылау жасалды. Өңір басшылығының тапсырмасымен құрылған жұмыс тобы ТЖД, Ертіс бассейндік су инспекциясы және «Қазгидромет» мамандарымен бірлесіп, Ертіс пен Оба өзендерінің арналары, қар қоры және су шаруашылығы нысандарының жай-күйін тексерді. Нәтижесінде гидрологиялық жағдайдың тұрақты екені, ал Шүлбі ГЭС қалыпты режимде жұмыс істеп тұрғаны айтылды. Сонымен қатар су тасқыны кезеңінің қауіпсіз өтуін қамтамасыз ету үшін қосымша алдын алу қадамдары белгіленді.
Ақмола облысында су тасқынына қарсы айлық аясында Көкшетау қаласында тазалық және дайындық жұмыстары ұйымдастырылды. Іс-шараға ТЖД қызметкерлері, Мәлік Ғабдуллин атындағы Азаматтық қорғау академиясының курсанттары мен еріктілер қатысты. Олар қар тазалау, сондай-ақ инертті материал салынған қаптарды дайындау жұмыстарына жұмылдырылды. Акция барысында ондаған әлеуметтік осал санаттағы азаматтарға көмек көрсетіліп, жүздеген аулада жұмыстар атқарылды. Жергілікті атқарушы органдар қыс басталғалы бері ірі көлемде қар шығарып, су тасқыны тәуекелін азайтуға бағытталған материалдық қор қалыптастырған.
Шығыс Қазақстан облысында су қоймалары мен өзендерге тұрақты мониторинг жалғасуда. Қар шығару жұмыстары белсенді жүргізіліп, төтенше жағдайларға жедел әрекет ету үшін мыңдаған маман, мотопомпалар, жүзу құралдары мен арнайы техника дайындыққа келтірілді. Бұдан бөлек, инертті материалдар, жанар-жағар май және қорғаныш қаптарының қоры жасақталған. Өңірлік ТЖД тұрғындарға алдын ала қамдануды, соның ішінде аула аумақтарын тазалау мен еріген судың ағуына кедергі келтіретін мұзды жоюды ұсынады.
Жетісу облысында инженерлік қорғаныс шаралары кезең-кезеңімен жүзеге асырылып жатыр. Жоспарланған жобалардың басым бөлігі аяқталған: қорғаныш бөгеттері салынды және жаңғыртылды, су ағызу арналары мен арықтар қазылды, өзен арналары тазартылды және тереңдетілді. Қазіргі таңда өңірдегі гидрологиялық ахуал қалыпты, су деңгейі орташа көпжылдық көрсеткіштер шегінде. Су тасқыны қаупіне қарсы күштер мен техникалар, қажетті материалдық резервтер және эвакуациялық пункттер толық әзірленген.
Министрлік көктемгі кезеңде қауіпсіздік талаптарын сақтаудың маңызын еске салып, жергілікті билік органдары мен қызметтердің тәуекелдердің алдын алу бойынша жұмыстары жалғасатынын мәлімдеді.