Мақтаарал ауданында индустриялық әлеуетті арттыруға бағытталған өндірістік жобалар кезең-кезеңімен жүзеге асырылуда. Солардың бірі – арнайы экономикалық аймақта бой көтеріп жатқан «Мақтаарал XingFeng» жауапкершілігі шектеулі серіктестігінің мақта және өсімдік майын өндіретін заманауи зауыты. Жоба өңірдің өндірістік мүмкіндіктерін кеңейтіп, ауыл шаруашылығы өнімдерін терең өңдеуді дамытуға бағытталған маңызды бастамалардың бірі саналады.
Жобаның жалпы инвестициялық құны 5,8 миллиард теңгені құрайды. Кәсіпорын толық іске қосылғаннан кейін 40 жаңа тұрақты жұмыс орны ашылып, жергілікті тұрғындарды жұмыспен қамтуға елеулі үлес қосады.
Қазіргі уақытта құрылыс жұмыстарының бірінші кезеңінің шамамен 70 пайызы аяқталған. Өндірістік ғимараттардың құрылысы қарқынды жүргізіліп, заманауи технологиялық жабдықтарды орнату жұмыстары басталды. Сонымен қатар арнайы экономикалық аймақты инженерлік-коммуникациялық инфрақұрылыммен қамтамасыз ету жұмыстары да қатар атқарылуда.
Мақтаарал ауданының географиялық орналасуы жобаның тиімділігін арттыра түседі. Өңір республикадағы мақта шаруашылығы жақсы дамыған аудандардың бірі болғандықтан, өндіріс орнының шикізат көздеріне жақын орналасуы логистикалық шығындарды төмендетуге және дайын өнімнің бәсекеге қабілеттілігін арттыруға мүмкіндік береді. Бұған қоса ауданның шекаралық орналасуы мен жүзеге асырылып жатқан теміржол инфрақұрылымы жобалары экспорттық әлеуетті кеңейтіп, халықаралық нарықтарға шығуға қолайлы жағдай қалыптастырады.
Ауданның кәсіпкерлік және ауыл шаруашылығы бөлімінің басшысы Баязит Әлімқұлдың айтуынша, жаңа зауыттың іске қосылуы өңір экономикасына жан-жақты оң әсерін тигізеді. Ең алдымен, жергілікті мақта өндірушілер үшін өнім өткізудің жаңа мүмкіндіктері қалыптасады. Сонымен қатар мақтаны тек бастапқы өңдеумен шектелмей, терең өңдеу арқылы қосылған құны жоғары өнім өндіруге жол ашылады. Бұл ауданның өндірістік әлеуетін арттырып, бюджетке түсетін салық көлемінің ұлғаюына, сондай-ақ әлеуметтік және инфрақұрылымдық жобаларды қаржыландыру мүмкіндігінің кеңеюіне ықпал етеді. Бұдан бөлек, кәсіпорынның іске қосылуы көлік, логистика, сауда және қызмет көрсету салаларының дамуына серпін беріп, шағын және орта бизнес субъектілері үшін жаңа мүмкіндіктер қалыптастырады.
Мемлекет басшысының өңдеу өнеркәсібін дамыту және инвестиция тарту жөніндегі тапсырмалары аясында жүзеге асырылып жатқан бұл жоба Мақтаарал ауданының инвестициялық тартымдылығын арттырып, өндірістік инфрақұрылымның дамуына және өңірдің индустриялық әлеуетінің нығаюына жол ашады.
Жалпы, «Мақтаарал XingFeng» ЖШС жүзеге асырып жатқан жаңа зауыттың құрылысы аудан экономикасын әртараптандыруға, жаңа өндірістерді қалыптастыруға, тұрғындарды тұрақты жұмыспен қамтуға және ауыл шаруашылығы өнімдерін өңдеу көлемін ұлғайтуға мүмкіндік береді. Бұл өз кезегінде өңірдің әлеуметтік-экономикалық дамуына тың серпін бермек.
Аталған жоба Мемлекет басшысы айқындаған «Әділетті Қазақстан» реформасының негізгі бағыттарының бірі – өңірлік даму мен инфрақұрылымды дамыту саясатының басымдықтарына толық сәйкес келеді. Өндірістік инфрақұрылымды жетілдіру, инвестициялық жобаларды іске асыру және өңдеу өнеркәсібін дамыту арқылы өңірдің экономикалық әлеуеті күшейіп, жаңа жұмыс орындары құрылып, халықтың әл-ауқатын арттыруға берік негіз қалануда.