Мемлекет басшысы ұсынған «Әділетті Қазақстан» реформасының негізгі бағыттарының бірі – экономикалық әділеттілікті қамтамасыз ету, шағын және орта бизнесті қолдау, өндірісті дамыту және өңірлік экономиканы күшейту арқылы халықтың әл-ауқатын арттыру болып табылады. Осы бағытта отандық кәсіпкерлікті дамыту, жаңа өндіріс орындарын ашу және экспорттық әлеуетті арттыруға ерекше мән берілуде.
Соңғы жылдары Қазақстанда азық-түлік өнеркәсібі, соның ішінде сүт өнімдерін өңдеу және балмұздақ өндірісі қарқынды дамып келеді. Елде өндірілетін балмұздақ өнімдері ішкі нарықты толық қамтамасыз етіп қана қоймай, әлемнің 10-нан астам еліне экспортталуда. Сапалы өнімге деген сұраныстың артуы нәтижесінде өндіріс көлемі де соңғы кезеңде 30 пайызға дейін ұлғайған.
Тәтті өнімнің тарихы 1786 жылы АҚШ-та басталғанымен, бүгінде бұл сала Қазақстанда да қарқынды дамып, халықаралық нарықта бәсекеге қабілетті деңгейге жетіп отыр. Соның айқын дәлелі – Түркістан облысы, Төлеби ауданындағы Бірінші Мамыр ауылында орналасқан балмұздақ өндірісі кешені.
Аталған кәсіпорын – өңірдегі шағын және орта бизнестің табысты үлгілерінің бірі. Кең ауқымды өндірістік кешен бүгінде тек отандық нарықта ғана емес, шетелдік брендтермен де бәсекеге түсіп, сапалы өнімдерімен танылып келеді. Бұл кәсіпорын «Әділетті Қазақстан» реформасы аясында бизнесті қолдау және өндірісті дамыту саясатының нақты нәтижесін көрсетіп отыр.
Бүгінде зауытта 200-ге жуық балмұздақ түрі өндіріледі. Сонымен қатар, түрлі тәтті өнімдер мен дайын кондитерлік өнімдер де шығарылып, ассортимент жыл сайын кеңейіп келеді. Кәсіпорынның жылдық өндіріс көлемі шамамен 10 000 тонна дайын өнімді құрайды. Бұл – өңірлік өндіріс үшін жоғары көрсеткіштердің бірі.
Кәсіпорын өкілдерінің айтуынша, өндірілген өнімдер Қазақстанның барлық өңірлеріне тұрақты түрде жеткізіледі. Бұдан бөлек, экспорттық бағыт та кеңейіп отыр. Қазіргі таңда өнімдер Әзірбайжан, Қырғызстан, Қытай және Ресей елдеріне жөнелтілуде. Бұл отандық өнімнің сапасы халықаралық нарықта жоғары бағаланып отырғанын көрсетеді.
Өндіріс процесінде сапа мен қауіпсіздік басты назарда ұсталады. Зауытқа жеткізілетін шикізат бірден өндіріске жіберілмейді. Ол арнайы зертханалық тексерістен өтіп, жан-жақты сараптамадан өтеді. Мамандар сүттің майлылығы, тығыздығы және қышқылдығы сияқты негізгі көрсеткіштерді мұқият бақылап, тек талапқа сай шикізатты ғана өндіріске қабылдайды.
Кәсіпорын тәулігіне шамамен 20 тоннаға жуық сүт қабылдайды. Мамандардың айтуынша, талапқа сай келмейтін шикізаттың өндіріске жіберілуіне қатаң түрде жол берілмейді. Бұл – дайын өнім сапасының негізгі кепілі және тұтынушы сенімін қалыптастыратын басты фактор.
Зауытта заманауи технологиялар енгізіліп, өндіріс процестері толық автоматтандырылған. Бұл өнім сапасының тұрақтылығын қамтамасыз етіп қана қоймай, еңбек өнімділігін арттыруға да мүмкіндік береді. Сонымен қатар, кәсіпорында санитарлық және қауіпсіздік талаптары қатаң сақталады.
«Әділетті Қазақстан» реформасының негізгі қағидаттарының бірі – шағын және орта бизнесті қолдау арқылы өңірлердің экономикалық әлеуетін арттыру. Осы тұрғыдан алғанда, аталған балмұздақ өндірісі кәсіпорны Төлеби ауданында жергілікті экономиканы дамытуға, жаңа жұмыс орындарын ашуға және ауыл тұрғындарының табысын арттыруға елеулі үлес қосып отыр.
Кәсіпорынның дамуы жергілікті шикізат өндірушілермен байланысын нығайтып, ауыл шаруашылығы саласының да өркендеуіне ықпал етуде. Сүт өнімдерін тұрақты сатып алу ауылдағы фермерлер үшін тұрақты табыс көзіне айналған.
Сонымен қатар, кәсіпорынның экспорттық әлеуеті артып, Қазақстанның брендтік өнімдерін шетел нарығына шығару мүмкіндігін кеңейтуде. Бұл өз кезегінде ұлттық экономиканың бәсекеге қабілеттілігін арттыруға ықпал етеді.
Жалпы алғанда, Төлеби ауданындағы балмұздақ өндірісі – шағын және орта бизнесті дамытудың, өңірлік экономиканы күшейтудің және «Әділетті Қазақстан» реформасының нақты нәтижесін көрсететін табысты жоба. Мұндай өндірістер ел экономикасының тұрақты дамуына, халықтың әл-ауқатын арттыруға және отандық өнімнің халықаралық деңгейде танылуына жол ашуда.
ТӨЛЕБИ АУДАНЫНДА БАЛМҰЗДАҚ ӨНДІРІСІ ДАМЫП, ШАҒЫН ЖӘНЕ ОРТА БИЗНЕС ТАБЫСТЫ ЖҮЗЕГЕ АСЫП ОТЫР
