Қазақстанның құқықтық тәртіп әскерінде жауынгерлердің тамақтану сапасын бақылаудың мүлде жаңа форматы енгізілді. Президент Қасым-Жомарт Тоқаевтың цифрландыру жөніндегі тапсырмасы аясында Ұлттық ұланда бірегей пилоттық жоба таныстырылды.
Бұл бастама асхана жұмысының ашықтығын қамтамасыз етуге және азық-түлік қауіпсіздігін күшейтуге бағытталған.
Қазіргі уақытта жаңа аппараттық-бағдарламалық кешен елордадағы 5573 әскери бөлімінде сынақтан өтуде. Жобаның басты артықшылықтары:
-
Жедел кері байланыс: Сарбаздар асханадағы арнайы электронды панель арқылы тағам сапасына бірден баға бере алады.
-
Ашықтық: Қойылған бағалар мен ескертулер нақты уақыт режимінде бөлім басшылығы мен азық-түлік жеткізуші компанияға жолданады.
-
Адами факторды азайту: Жүйе жемқорлық тәуекелдерін жоюға және бюджет қаражатының мақсатты жұмсалуын бақылауға мүмкіндік береді.
Ішкі істер министрінің орынбасары – Ұлттық ұланның Бас қолбасшысы Аңсаған Балтабеков әскери қызметшілердің әлеуметтік жағдайы, оның ішінде сапалы тамақтануы — әскердің жауынгерлік дайындығының негізі екенін айтып өтті. Жиында азық-түлік жеткізушілердің жұмысына жүргізілген аудит нәтижелері мен санитарлық талаптарды күшейту мәселелері де талқыланды.
«Бұл жүйе бізге өз пікірімізді еркін білдіруге жол ашты. Қай тағамның дәмді, қайсысының кемшілік бар екенін жасырмай айта аламыз. Нәтижесінде ас мәзірі айтарлықтай жақсарып келеді», — дейді кіші сержант Нұралы Жазит.
Цифрлық бағалау жүйесінің тиімділігі биылғы тамыз айына дейін сарапталады. Егер сынақ сәтті өтсе, бұл тәжірибе еліміздің барлық әскери бөлімдеріне енгізілетін болады.
Бүгінде Ұлттық ұланның 7 мыңнан астам сарбазы еліміздің 21 қаласында қоғамдық қауіпсіздікті күзетеді. Тағы 2 мыңнан астам әскери қызметші стратегиялық маңызы бар нысандар мен ҚАЖ мекемелерінің күзетінде тұр. Осындай ауқымды күштің әлеуметтік жағдайын жақсарту — мемлекеттік деңгейдегі басымдық.