«Әділетті Қазақстан» реформасының негізгі бағыттарының бірі – өңірлік даму мен инфрақұрылымды жетілдіру, инвестициялық жобаларды қолдау және шағын және орта бизнестің әлеуетін арттыру болып табылады. Осы мақсатта еліміздің барлық өңірлерінде өндірістік қуатты күшейтуге, жаңа жұмыс орындарын ашуға және әлеуметтік инфрақұрылымды дамытуға бағытталған ауқымды жобалар жүзеге асырылуда. Түркістан облысында да бұл бағыттағы жұмыстар жүйелі түрде жалғасып, өңір экономикасының тұрақты дамуына серпін беруде.
Түркістан облысының солтүстік бөлігінде орналасқан Созақ ауданы бүгінде еліміздің индустриялық әлеуетін арттырып отырған маңызды өндірістік аймақтардың біріне айналды. Әсіресе стратегиялық маңызы жоғары уран өндірісі өңір экономикасының негізгі драйверлерінің бірі саналады. Осы салада табысты жұмыс істеп келе жатқан «СП «Инкай» жауапкершілігі шектеулі серіктестігі биыл өзінің 30 жылдық мерейтойын атап өтті. Кәсіпорынның мерейтойлық іс-шарасына Түркістан облысының әкімі Нұралхан Көшеров арнайы қатысып, компанияның өндірістік жетістіктері мен әлеуметтік жауапкершілік бағытындағы жұмыстарына жоғары баға берді.
Бұл мерейтой – тек бір кәсіпорынның мерекесі ғана емес, өңірдегі өндіріс пен әлеуметтік дамудың өзара сабақтасып жатқанын көрсететін маңызды белес. Үш онжылдық ішінде компания тек уран өндіру саласында ғана емес, ауданның әлеуметтік-экономикалық дамуына да елеулі үлес қосып келеді. Бүгінде кәсіпорын өндірістік қуатты арттырумен қатар, халықтың тұрмыс сапасын жақсарту және инфрақұрылымды дамыту бағытындағы жұмыстарды қатар алып жүруде.
Созақ ауданына жұмыс сапары барысында облыс әкімі алдымен кәсіпорынның өндірістік және әлеуметтік инфрақұрылымымен танысты. Компания аумағындағы заманауи спорт кешені, жаттығу залдары, жұмысшыларға арналған жайлы тұрғын блоктар мен сапалы асхана өндіріс мәдениетінің жоғары деңгейде қалыптасқанын аңғартады. Мұндай қолайлы жағдайлар еңбек өнімділігін арттырып қана қоймай, жұмысшылардың әлеуметтік тұрмысын жақсартуға мүмкіндік береді.
Өңір басшысы Мемлекет басшысының бизнестің әлеуметтік жауапкершілігін күшейту жөніндегі тапсырмасы Созақ ауданында нақты жүзеге асып жатқанын атап өтті. Компанияның тек өндірістік табысқа емес, әлеуметтік тұрақтылық пен халықтың әл-ауқатына да басымдық беруі – «Әділетті Қазақстан» реформасының басты қағидаттарының бірі саналатын жауапты бизнес моделінің айқын көрінісі.
Мерейтой аясында орнатылған жаңа монументтің ашылуы компанияның 30 жылдық тарихына көрсетілген құрметпен қатар, алдағы даму кезеңдерінің де нышаны болды. Салтанатты шара барысында мәртебелі қонақтар арнайы естелік кітабына қолтаңба қалдырып, мемлекет пен инвестор арасындағы сенімді әріптестіктің маңызын атап өтті.
Жиында сөз сөйлеген облыс әкімі Нұралхан Көшеров компанияның аудан экономикасындағы орнына ерекше тоқталды. Оның айтуынша, «СП «Инкай» ЖШС» Созақ ауданының әлеуметтік-экономикалық дамуына тұрақты үлес қосып келе жатқан стратегиялық кәсіпорындардың бірі.
Шынында да, Созақ ауданында жүзеге асырылған бірқатар инфрақұрылымдық жобалар компанияның қолдауымен іске асқан. Атап айтқанда, білім беру, денсаулық сақтау және спорт салаларына бағытталған әлеуметтік нысандар жаңартылып, ауылдық елді мекендерді абаттандыру жұмыстары жүргізілген. Бұл өңір тұрғындарының өмір сүру сапасын арттыруға оң әсер етуде.
Сонымен қатар кәсіпорын жаңа жұмыс орындарын ашу арқылы аудан тұрғындарын тұрақты жұмыспен қамтуға да айрықша көңіл бөліп келеді. Өндіріс көлемінің ұлғаюы жергілікті кәсіпкерліктің дамуына да ықпал етуде. Компаниямен әріптестік орнатқан шағын және орта бизнес субъектілері қызмет көрсету, логистика, құрылыс, тамақтандыру және техникалық қызмет көрсету салаларында өз жұмысын дамытуға мүмкіндік алып отыр. Бұл өз кезегінде өңір экономикасының әртараптануына және кәсіпкерлік белсенділіктің артуына ықпал етеді.
Кәсіпорын экологиялық тұрақтылық мәселесіне де ерекше назар аударып келеді. Өндірісте халықаралық стандарттарға сай заманауи технологиялар қолданылып, қоршаған ортаға әсерді азайту бағытындағы шаралар жүйелі түрде жүзеге асырылуда. Бұл компанияның тек экономикалық пайдаға ғана емес, болашақ ұрпақ алдындағы жауапкершілікке де басымдық беретінін көрсетеді.
Жалпы алғанда, «Инкай» компаниясының 30 жылдық белесі – тек бір кәсіпорынның жетістігі ғана емес, бүкіл Созақ ауданы мен Түркістан облысының ортақ табысы. Өндірістік қуатты әлеуметтік жауапкершілікпен ұштастыра білген кәсіпорын өңірлік даму, инфрақұрылымды жетілдіру және шағын және орта бизнесті қолдау бағытындағы жұмыстардың жарқын үлгісіне айналып отыр.
Созақтағы уран өндірісі – өңірлік даму мен әлеуметтік жауапкершіліктің жарқын үлгісі
