Мемлекет басшысы Түркістан облысына өңір жұртшылығымен кездесті. Президент өз сөзінде еліміздің әлеуметтік-экономикалық дамуын қорытындылап, Конституциялық реформаның тарихи маңызы мен жастардың рөліне ерекше тоқталды.
Жиын соңында Қасым-Жомарт Тоқаев ел дамуына елеулі үлес қосқан бірқатар азаматты мемлекеттік наградалармен марапаттап, барша қазақстандықтарды Әз-Наурыз мейрамымен құттықтады.
Түркістан – рухани қазына және саяси орталық
Президент Түркістанның қазақ тарихындағы орны бөлек екенін атап өтті.
«Түркістан – түбі бір түркі жұртының қасиетті шаңырағы, халқымыздың қайсар рухы мен теңдессіз мәдениетінің символы. Бұл жерде ұлтымыздың тағдырын айқындаған маңызды шешімдер қабылданған», – деді Мемлекет басшысы.
Сондай-ақ, мамыр айының ортасында Түркістанда Түркі мемлекеттері ұйымының жоғары деңгейдегі жиыны өтетінін хабарлап, Үкіметке бұл шараны мінсіз ұйымдастыруды тапсырды.
Президент өңірдің даму қарқынына оң баға берді:
-
Экономика: Өткен жылы аймақ экономикасы 14%-ға өсіп, салық түсімі алғаш рет 1 трлн теңгеден асты.
-
Инвестиция: Облысқа 1,7 трлн теңге инвестиция тартылды.
-
Инфрақұрылым: 83 әлеуметтік нысан, оның ішінде 16 жаңа мектеп пен 35 медициналық мекеме іске қосылды.
Дегенмен, Президент кейбір аудандардағы ауыз су мәселесін тез арада шешуді және Кентау ЖЭО мен бу-газ қондырғысының құрылысын қатаң бақылауға алуды тапсырды.
Мемлекет басшысы Конституциялық реформаның сәтті жүзеге асқанын және оған халықаралық қоғамдастықтың жоғары баға бергенін айтты.
-
Тарихи қолдау: Референдумда түркістандықтардың 92,21%-ы жаңа Ата заңды қолдаған.
-
Жаңа мереке: Конституция 1 шілдеден бастап күшіне енеді. Ал референдум өткен күн — 15 наурыз жыл сайын мемлекеттік мереке ретінде атап өтіледі.
«Адал азамат» және еңбек культі
Президент жастарға ерекше үміт артатынын жеткізді. Оның айтуынша, жаңа Конституция — ең алдымен өскелең ұрпақтың құжаты.
«Нағыз отаншыл азамат – өз жұмысын адал атқаратын адам. Қоғамға жалаң ұран емес, нақты іс керек. Адал еңбек — біздің басты құндылығымыз болуы тиіс», – деді Президент.
Сөз соңында Қасым-Жомарт Тоқаев қазақстандықтарды өткеннің қасіретіне мұңаймай, тек алға қарауға шақырды. Мемлекеттің болашағы озық технологиялар мен жасанды интеллектіні игеруде екенін, бұл жолда бүкіл ұлт болып жұмылу қажеттігін айтты.