7 сәуірден бастап Алматы аумағында жасыл желектерді биологиялық өңдеу жұмыстарының маусымы ашылды. Қалалық экология және қоршаған орта басқармасы мәлімдегендей, бұл шара мегаполистегі ағаштардың иммунитетін көтеріп, зиянкестерден қорғауға бағытталған.
Жалпы алғанда, қала бойынша 2,3 миллионнан астам ағаш пен бұта өңделеді. Жұмысқа арнайы лицензиясы бар кәсіби мердігер ұйымдар тартылған.
Дәрілеу кестесі: 4 кезең
Мамандардың айтуынша, өңдеу жұмыстары өсімдіктердің өсу циклі мен зиянкестердің белсенділігіне байланысты төрт кезеңге бөлінген:
-
I кезең: 7 сәуір – 30 мамыр;
-
II кезең: 1 маусым – 30 маусым;
-
III кезең: 5 шілде – 5 тамыз;
-
IV кезең: 15 тамыз – 20 қыркүйек.
Дәрілеу жұмыстары негізінен түнгі уақытта жүргізіледі. Бұл күн сәулесінің әсері жоқ кезде биологиялық препараттардың тиімділігін барынша арттыруға мүмкіндік береді.
Ведомство өкілдері тұрғындарды мазасызданбауға шақырады:
«Қолданылатын биологиялық және химиялық заттардың барлығы сертификатталған. Олар қауіптілігі төмен топқа жатады, сондықтан қала тұрғындарына, үй жануарлары мен құстарға ешқандай зияны жоқ», — деп хабарлады басқармадан.
Жүйелі түрде жүргізілетін бұл жұмыстар Алматының «жасыл қала» мәртебесін сақтауға және қалалық экожүйенің тепе-теңдігін нығайтуға септігін тигізеді.