2026 жылдың бірінші тоқсанының қорытындысы бойынша Алматыдағы ескі үйлердің 204 иесі заманауи баспанаға ие болды. Қалалық реновация бағдарламасы аясында жүзеге асқан бұл жоба мегаполистің сәулеттік келбетін жаңартып, тұрғындардың қауіпсіздігін қамтамасыз етуді көздейді.
Қоныс аудару жұмыстарын «Almaty Renovation» ЖШС, «Алматы» ӘКК және жеке инвесторлар бірлесе атқарды. Тұрғындарға таңдау бойынша «бөлмеге — бөлме» қағидатымен жаңа пәтер немесе мүліктің нарықтық құнына сай ақшалай өтемақы ұсынылды.
Жаңа баспанаға көшкендердің басым бөлігі Түрксіб ауданына тиесілі. Толық көрсеткіш төмендегідей:
-
Түрксіб ауданы: 126 адам;
-
Әуезов ауданы: 53 адам;
-
Бостандық ауданы: 13 адам;
-
Алатау, Медеу, Жетісу және Алмалы аудандары: 12 адам.
Жаңа пәтерлер «дайын күйінде» (таза әрлеумен) тапсырылды. Үйлер интернет желісімен, өртке қарсы жүйелермен, заманауи сантехникамен және ас үй жабдықтарымен (газ/электр плиталары) толық жабдықталған.
Бағдарлама аясында сейсмикалық қауіпті аймақтарда орналасқан және каркас-қамысты құрылыстарды бұзуға ерекше көңіл бөлінуде.
«Біздің мақсатымыз — қалалық ортаны жайлы етіп, тұрғындарды қауіпсіз үйлермен қамтамасыз ету. 2030 жылға дейін 1 403 ескі үйді бұзып, 7,5 мыңға жуық меншік иесін көшіруді жоспарлап отырмыз», — деп атап өтті «Almaty Renovation» ЖШС бас директоры Еркебұлан Османбаев.
Бағдарламаның ерекшеліктері:
-
Келісім бойынша көшіру: Үйді бұзу жұмыстары тек барлық тұрғынның 100% келісімімен ғана жүргізіледі.
-
Инклюзивті орта: Ерекше қажеттілігі бар жандар үшін пәтерлер бірінші қабаттан немесе лифт пен пандусы бар кедергісіз нысандардан беріледі.
-
Таңдау құқығы: Тұрғындар көшуден бас тарта алады, алайда бұл жағдайда ескі үйдің техникалық қауіп-қатеріне өздері жауапты болады.
Биыл жыл соңына дейін жалпы саны 95 ескі үйді бұзу жоспарланған. Жыл қорытындысы бойынша барлығы 1 165 адам жаңа баспанаға ие болады деп күтілуде.
Инвесторлар үшін жобаға қатысу мүмкіндігі ашық. Өтінімдер мен іріктеу шарттары «Алматы» ӘКК ресми сайтында жарияланған.