Алматыдағы «Almaty Arena» спорт кешенінде бұрын-соңды болмаған ауқымды мәдени флешмоб өтті. Көктемгі демалыс қарсаңында ұйымдастырылған шарада 11,5 мыңнан астам жас өнерпаз ұлттық аспаптың үнін асқақтатты.
Қаланың түкпір-түкпірінен жиналған мектеп оқушылары классикалық күйлер мен қазіргі заманғы туындыларды шебер ұштастырды. Репертуарда қазақ композиторларының алтын қорындағы шығармалармен қатар, белгілі күйші-виртуоз Асылбек Еңсеповтің танымал композициялары орындалды. Мыңдаған домбыраның бір арнаға тоғысқан қуатты үні залда ерекше рухты атмосфера қалыптастырды.
Бұл тарихи сәттің маңызын арттыру үшін шараға өнер жұлдыздары мен Қазақстанның Рекордтар кітабының өкілдері қатысты. Сарапшылар нәтижені ресми түрде тіркеп, бұл жетістік ел тарихындағы ең ауқымды домбырашылар челленджі ретінде рекордтар тізіміне енді.
Қатысушылар лебізі:
- Нұрсұлтан Құдайбергенов (№189 мектеп оқушысы): «Осындай тарихи сәттің бөлшегі болғаныма өте қуаныштымын. Барша қазақстандықтарды келе жатқан Наурыз мейрамымен құттықтаймын!»
- Қарлығаш Қалмамбетова (музыка пәнінің мұғалімі): «Біз бұл күнге бірнеше апта бойы тынымсыз дайындалдық. Домбырашылар үні ешқашан үзілмесін, бұл бастама ұрпақтар сабақтастығының белгісіне айналды».
Ұйымдастырушылардың айтуынша, бұл флешмоб жай ғана концерт емес, ұлттық өнерге деген сүйіспеншілік пен бірліктің символы. Алматы қаласы бұл кеште дәстүрлі құндылықтарды заман талабына сай жаңғырта алатын ірі мәдени орталық екенін тағы бір мәрте дәлелдеді.