Қазақстан Республикасының Мемлекеттік кеңесшісі Ерлан Қарин Жаңа Конституция жобасы бойынша өтіп жатқан жалпыхалықтық референдумда өз таңдауын жасады.
Мемлекеттік кеңесші елордадағы Ұлттық академиялық кітапхана ғимаратында орналасқан №129 сайлау учаскесіне барып, дауыс берді. Төл таңдауын жасағаннан кейін Ерлан Қарин БАҚ өкілдеріне сұхбат беріп, бүгінгі күннің ел тарихындағы маңызына тоқталды.
Ерлан Қариннің айтуынша, бүгінгі саяси науқан — айлап жүргізілген ауқымды жұмыстың түйіні.
«Бүгін — ерекше күн. Біз жарты жылға созылған ауқымды қоғамдық дискуссияның нәтижесін шығарып жатырмыз. Мемлекет басшысы өткен жылғы Жолдауында бір палаталы Парламентке көшу бастамасын көтерген болатын. Содан бері өткен 189 күн ішінде азаматтардан мыңдаған ұсыныс түсті. Халық бұл үдеріске барынша белсенді араласып, зор қызығушылық танытты», — деді Мемлекеттік кеңесші.
Мемлекеттік кеңесші референдум арқылы қазақстандықтар елдің алдағы даму бағытын, құндылықтарын және қоғамдық құрылымын таңдайтынын атап өтті. Оның пайымынша, бүгін қабылданатын шешім мемлекетіміздің келесі даму кезеңін айқындамақ.
Сондай-ақ Ерлан Қарин бұл соңғы төрт жыл ішінде Мемлекет басшысының бастамасымен өткізіліп отырған үшінші референдум екенін еске салды.
-
Маңызды шешімдерді халықтық талқылау арқылы қабылдау саяси өміріміздің қалыпты нормасына айналды.
-
Тұрақты диалог пен қоғамдық пікірге сүйену тұрғысынан Қазақстан халықаралық деңгейде үлгі көрсетіп отыр.
-
Бұл науқан — қоғам мен билік арасындағы сенімді нығайтатын маңызды белес.
Ерлан Қарин сөзінің соңында бүгінгі қабылданатын шешімнің ел үшін тарихи маңызы зор болатынына сенім білдірді.