Мемлекет басшысы Қасым-Жомарт Тоқаев Ішкі істер министрі Ержан Сәденовті қабылдап, еліміздегі құқықтық тәртіптің жай-күйімен танысты. Кездесу барысында қоғамдық қауіпсіздікті нығайту бойынша бұған дейін берілген тапсырмалардың орындалу барысы талқыланды.
Қылмыс деңгейінің төмендеуі және ашылу көрсеткіші
-
Биылғы алғашқы екі айдың қорытындысы бойынша Қазақстанда қылмыс саны 8 пайызға азайған.
-
Бұл өткен жылдың сәйкес кезеңімен салыстырғанда құқықбұзушылық санының 1,3 мыңға қысқарғанын көрсетеді.
-
Қылмыстарды ашу деңгейінің оң динамикасы байқалады.
Киберқылмыс пен ұйымдасқан қылмысқа қарсы іс-қимыл
-
Халықаралық ынтымақтастық пен алдын алу шараларының нәтижесінде интернет-алаяқтық пен киберқылмыс көлемі 4 пайызға кеміді.
-
Ұйымдасқан қылмыстық топтарға қарсы күрес аясында 11 топтың әрекетіне тосқауыл қойылып, 71 адам жауапкершілікке тартылды.
Есірткі бизнесіне соққы
-
Жедел іс-шаралар барысында 5 жасырын есірткі зертханасы жойылды.
-
Заңсыз айналымнан 881,5 килограмм есірткі заты тәркіленді, оның ішінде 104 килодан астамы – синтетикалық есірткі.
Заңнамалық жаңалықтар мен цифрландыру
-
2025 жылы қоғамдық қауіпсіздікті нығайту мақсатында «Құқықбұзушылықтың алдын алу туралы» жаңа Заң қабылданды.
-
Заңнамаға дропперлік, сталкинг және некеге мәжбүрлеу үшін қылмыстық жауапкершілік енгізу туралы өзгерістер енді.
-
Жол қауіпсіздігі мен көші-қонды бақылау саласына цифрлық технологиялар кеңінен енгізілуде.
Кездесу қорытындысы бойынша Президент елдегі заң мен тәртіпті қамтамасыз ету, жазадан бұлтартпау қағидатын қатаң сақтау жөнінде министрге бірқатар нақты міндеттер жүктеді.