Президент ұсынған «Әділетті Қазақстан» тұжырымдамасы бүгінде еліміздің барлық өңірлерінде, соның ішінде қарқынды дамып келе жатқан Түркістан облысында жаңа мазмұнға ие болуда. Реформалардың басты бағыты – азаматтардың өмір сүру сапасын арттыру, қоғамдық қауіпсіздікті нығайту және инфрақұрылымды цифрлық негізде жаңғырту. Бүгінгі Түркістан – заманауи технологиялар мен қауіпсіз орта тоғысқан жасампаз өңірдің үлгісіне айналып отыр.
Мемлекет басшысының жарлығымен 2021 жылы қабылданған «Қауіпсіз ел» ұлттық жобасы еліміздің қауіпсіздік архитектурасын түбегейлі өзгертуді көздеді. Бұл жай ғана салалық бағдарлама емес, әскери дайындықтан бастап, киберқылмыспен күреске дейінгі бағыттарды біріктіретін кешенді стратегия. Жобаның түпкі мақсаты — мемлекет мүддесін қорғаудың тиімді механизмін құру және қоғамдық ортада азаматтардың өздерін толықтай қауіпсіз сезінуіне жағдай жасау.
Түркістан облысында осы стратегия аясында нақты шаралар қолға алынды. Облыс аумағында бейнебақылау жүйелері кеңейтіліп, цифрлық бақылау тетіктері енгізілуде. Соңғы мәліметтерге сәйкес, өңірде 30 мыңнан астам бейнекамера орнатылып, құқық бұзушылықтардың алдын алу деңгейі айтарлықтай артқан. Бұл цифрлардың артында мыңдаған азаматтың тыныштығы мен қоғамдық тәртіптің сақталуы тұр.
Өңірдегі қауіпсіздікті қамтамасыз етуде Түркістан облыстық цифрландыру, мемлекеттік қызметтер көрсету және архивтер басқармасының «Цифрлық даму орталығы» мекемесі маңызды рөл атқаруда. Мекеменің мемлекеттік-жекешелік әріптестікті бақылау бөлімі құқық бұзушылықтарды бейнебақылау арқылы анықтап, жергілікті полиция қызметкерлеріне жедел хабарлаумен айналысады.
Бүгінгі таңда облыс бойынша ахуалдық орталыққа жалпы 824 бейнекамера қосылған. Мекеме басшысы Талғат Әшірбековтың мәлімдеуінше, цифрландыру жұмыстары білім беру саласын да кеңінен қамтып отыр. Мәселен, 2025 жылы өңірде ашылған 25 жаңа мектептің 23-і толықтай жоғары жылдамдықты интернетпен қамтамасыз етілген. Бұл – ауыл мен қала арасындағы цифрлық алшақтықты жоюдың нақты қадамы.
Сонымен қатар, облыстағы 806 мектеп пен балабақшаның бейнекамералары «Жедел басқару орталықтарына» сәтті интеграцияланды. Бұл балалардың қауіпсіздігін қашықтан бақылауға мүмкіндік береді. Техникалық қолдау бөлімі тарапынан өткен жылы өңірде 5 000 антивирустық бағдарлама орнатылып, 100 аппараттық-бағдарламалық кешен және 220 жалпы бейнебақылау камералары іске қосылды. Киберқауіпсіздік мәселесі де реформалардың басым бағытында қалып отыр.
Түркістан облысында «Әділетті Қазақстанды» құру қағидатын жүзеге асыру негізінде 109-бірыңғай байланыс орталығы жүзеге асырылуда. Мекеме басшысының орынбасары Жансая Алпамысованың айтуынша, орталық тәулік бойы тұрақты қызмет көрсетеді.
Статистикалық мәліметтерге сүйенсек, 2025 жылы орталыққа 162 320 өтінім түскен, оның 160 450-сі уақытылы орындалған. Ал 2026 жылдың 17 сәуіріне дейінгі аралықта 54 828 өтініш тіркеліп, оның 54 320-сы оң шешімін тапқан. Бұл көрсеткіштер жергілікті атқарушы органдардың халық мұқтажына жедел жауап беру қабілетінің артқанын көрсетеді. Әрбір өтініштің орындалу барысы цифрлық жүйе арқылы қадағаланып, мемлекеттік қызметтің ашықтығын қамтамасыз етуде.
Сәулетті қала – қауіпсіз қала: Жарықтандыру реформасы
Түркістан қаласының рухани астана ретіндегі мәртебесі оның эстетикалық келбеті мен инфрақұрылымына жоғары талаптар қояды. Қазіргі таңда қалада тұрғын үйлер мен кәсіпкерлік нысандардың сәулеттік келбетін жақсарту және түнгі қауіпсіздікті арттыру мақсатында заманауи жарықтандыру жүйелері кезең-кезеңімен іске қосылуда.
Жоспарланған 107 көпқабатты тұрғын үйдің 30-дан астамы қазірдің өзінде заманауи жарықпен қамтылған. Жаңа LED шамдар мен энергия үнемдейтін технологиялар тек ғимараттардың сәулеттік бейнесін айқындап қана қоймай, түнгі уақытта қылмыстың алдын алуға және жол-көлік оқиғаларын азайтуға септігін тигізеді. Көшелер мен аулалардың жарық болуы тұрғындардың жайлы өмір сүруіне және шағын бизнестің тартымдылығын арттыруға қолайлы орта қалыптастыруда.
Түркістан облысындағы бұл кешенді жұмыстар – «Әділетті Қазақстан» құру жолындағы жүйелі қадамдардың нәтижесі. Реформалардың басты жемісі – халықтың билікке деген сенімі мен қауіпсіздік сезімінің нығаюы. Цифрландыру, бейнебақылау жүйелерінің кеңеюі, жедел байланыс орталықтарының ашықтығы және қала инфрақұрылымының жаңғыруы өңірді жаңа даму белесіне шығарды.
Қорыта айтқанда, Түркістан облысында жүзеге асырылып жатқан реформалар тек статистикалық көрсеткіштер емес, бұл — әрбір азаматтың қауіпсіздігі, балалардың сапалы білімі және жайлы тұрмысы. «Әділетті Қазақстан» – бұл тәртіп пен заң үстемдік құрған, технология халық игілігіне жұмыс істейтін орта. Түркістан өңірі осы асқақ мақсатқа жету жолында нық қадаммен ілгерілеп келеді.